(NI NOEL ABUELA)

AGAD tinapos ng Senate finance subcommittee ang pagtalakay sa hinihinging pondo ng Office of the President na aabot sa P8.2 bilyon para sa susunod na taon.

Hindi na pinatagal pa ni Senador Christopher Lawrence Go ang pagdinig sa komite nito at kinailangan lang ng 10 minuto at agad na pinagtibay ang pondo ng OP.

Kasama rin sa komite ang mga kaalyado ng Pangulong Rodrigo Duterte na sina Senador Francis Tolentino at Senador Ronald dela Rosa na hindi na nagtanong pa kung saan gagamitin ang pondo ng OP.

“Familiar faces but magka-opposite side na tayo ngayon.  It doesn’t mean na I will not scrutinize you all, maraming media ngayon baka sabihin nila na walang check and balance dito sa pagdinig na ito,” litanya pa ni Go.

Pinangunahan ni Executive Secretary Salvador Medialdea ang paghahain sa P8.2-B budget ng OP na mas mataas ng 21 porsiyento kung ikukumpara sa nakalipas na taon na P6.8B.